أصعب سؤااال

موضوع: أصعب سؤااال السبت 03 مايو 2008, 10:10 am

أصعب سؤال اللي جوابه للأسف مثله سؤال
ماهو تفلسف الا موقف صار واسمع ثاني بيت
البارحة يومه سأل وش ذكرك ذيك الليال
كان الجواب بكل بساطة من متى اصلا نسيت
ادري بأن جمع الصعوبة والبساطة شي محال
لكنها صارت كذا واللي أهم اني دريت
ان الحياة في بعد احبابك اذا جف الوصال
بتعيشها لو تقتنع انك خلاص اصبحت ميت
ياصاحبي لو كل شي يمر بالخاطر يقال
ماكانت العبرة تولجني ليا منك طريت
شفني قدرت احبس دموعي بس دمع القاف سال
وياكبرها ساكت ولكن داخل اوراقي بكيت
عمر الحكي ماكان دافي لابتدى بقولة تعال
لجل تجاهل رجفة حروفي ليا مني حكيت
الحال في بعدك قسم بالله ما سميه حال
انوي على الضحكة واحس كلي خطا لني نويت
تصور انك من رحلت اشوفك لجسمي ضلال
لا شفته امشي يبتعد واثره معي مهما مشيت
مدام يعني في بحرك لفرحتي مليون جال
وش فيه موجك ماركد قربت اموت ومارسيت
يرضيك ماعادت معي تفرق اذا جالك مجال
لاني اقتنعت انك نهاية واني ببطي مابديت
صرت اعقد احجاجي اذا جابوك باطراف الجدال
وأنا قبل لا قالوا اسمك كني ميت ثم حييت
تعبت اعيش الدور وافتح للمعاذير الخيال
واتخيل اني جيت في بالك وبانك استحيت
وترد لي كلك وله وتقول كن البعد طال
ومن الفرح ماعاتبك واقول ياخي مابغيت
حتى وأنا اتخيل حشمتك لان قلبي لا يزال
يكرر اسمك داخل اعماقي بنبضه لا سهيت
قلي شسوي فيك وانت بداخلي اصدق مثال
للحب واحساس القصيد ومعانق الليل وسريت
ربي يصبرني على الفرقا مدام الحظ مال
وانت بيجيلك يوم تعرف ليه في بعدك شكيت
واذا بلاك الله وعذبك اشتياقك بس تعال
واقرا القصايد في غيابك كل ابوها بيت بيت
وبتدري ان اصعب سؤال اللي يجي رده سؤال
لا قلتلي وش ذكرك ثم قلتلك متى نسيت

منقوول\